Central London 泊車如戰場

作者：貝殼

十月頭嘅tube strike最後叫停，但早有準備嘅我已經租左架hire car，因為要出job。既然已經預訂左，公司又已經approve左，咁就索性享受一下，舒舒服服咁揸車返工。

我從事攝影，經常要帶好多器材。如果無車嘅話就要搬搬抬抬，每次開完工都周身酸痛。加上最近終於喺倫敦考到車牌，所以好嚮往可以開車返工，努力咗一年後終於實現。

嗰日工作地點係Kensington，central到無得再central。個job係關於一位知名電視主播幫手launch一個新產品，預計影三個鐘。

由出發揸到去Kensington一直都好好地。雖然全程限速20mph、每過幾秒又停燈，好考起我揸棍波嘅功力，但總算順利，泊埋車準時到達。

大概兩個鐘之後，攝影嘅部分完成。正當我打開電腦，準備處理後製嘅部分嘅時候，個parking就提醒我已經夠鐘，只俾我十五分鐘grace period去處理個車位。最大鑊係，原來個bay係no return bay，只限一次泊兩個鐘，係無得延長嘅。哇，今時今日倫敦市中心嘅車位，係有錢都買唔到！

我心諗，食牛肉乾的話，公司係唔會負責。但無理由貼錢返工架，於是我唯有丟低電腦同其他器材，同個crew講我去調車位，麻煩大家幫我看住財物。

一開走架車，我心知不妙。放棄咗個車位，真係唔駛旨意攞得翻，因為附近有無數嘅人同我一樣，兜緊圈吼住啲車位。呢類pay bay競爭之激烈，係不出數秒已經有人埋位。

我兜嚟兜去，兜到無雷公咁遠，一個空位都見唔到。有位個啲，一係只限住戶可以泊，一係就有各種suspension。兜左二十分鐘之後，居然俾我搵到一個空位，喺正路旁邊，前後都有車或障礙物夾住，但至少係個我可以用嘅車位。

我鼓起勇氣，試著倒後入個車位。但條路比我想象中窄，對面又泊左架大van，我扭嚟扭去都係泊唔到入去。搞左一陣，我前同後面嘅車排曬隊等我。最後我決定放棄，呢個車位無人泊果然係有原因。日光日白有個空位，it’s too good to be true！

再兜多十分鐘，終於又搵到另一個空位。呢個又係喺正路旁邊，前後都有人泊左，係得一個車身位。我見呢條路比較闊少少，個crew又已經催緊我，我只好硬著頭皮泊入去，唔得都要得。

最後係一眾嗶聲下，叫做泊左入去。電光火石間我泊得超肉酸，突曬出個格。但我已經無心力理太多，急急腳行翻去完成埋剩低嘅工作。收人三個鐘工錢，我卻消失左接近一個鐘。

入到去，成班crew喺度等我，好尷尬。好在都算準時交到貨，無拖累到其他人遲收工。

翻到屋企，身體不像平時般疲憊，但心卻超累！

雖然驚險，但總算賺來實戰經驗，畢竟真正嘅學習係由正式上路開始。喺倫敦揸車，的確問題多多，有無數嘅荒謬事情會發生。但坐係架車入面望住倫敦嘅街景，係有種獨特嘅美好。