「千人接力心連心」同d後生仔女有乜關係？
作者：在家基金董事高廣垣
可能你已經從身邊朋友或者群組聽聞，6月15號在家基金將會開始一個「千人接力心連心」嘅網上人鏈籌款活動，希望可以籌到今年足夠經費繼續資助現行的兩個項目，就係幫香港人搵工同埋提供臨時屋俾有需要嘅手足暫時棲身。今年仲會發一d獎學金喺呢度想繼續升學嘅年輕人。
我成日有個感覺，年輕人今日喺困難嘅時候得到小小幫助，可能第日佢哋有好好成就，又或者將來亦會轉為幫助其他有需要嘅人, 無論如何香港人圈子，甚至整個世界都會好咗。就好似我哋係2019年開始，喺運動期間，見到一個個互相幫忙嘅場面。例如當時嘅物資鏈咁，一個傳一個，一傳十，十傳百，百傳千，大家接力，好似喺獅子山上或者屋村周圍形成嘅人鏈一樣咁感動咁齊心。
幾個月前我去咗一間俾尋求政治庇護嘅年青人暫居嘅臨時屋，耳聞不如目睹，好好機會同d二十歲左右嘅朋友仔傾吓計。其中一個二十歲後生仔，因為反送中期間同屋企人鬧番咗，後嚟比屋企人呃佢，將佢賣咗去東南亞做奴隸（大家同我一樣可能都未聽過），每日喺塊爛地度，做檢拾鐵皮同埋整乾淨佢，日日損手爛腳。每日食嘅係發霉或者發臭嘅食物，瞓覺係老鼠甴曱蛇蟲鼠蟻周圍爬嘅地方。做咗幾個月，後來逃走出嚟，聯絡上喺英國嘅手足幫佢買機票。佢因為情況特殊，好幸運，一到埗就可以入住臨時屋。當時大冷天到達希斯魯機場，仲係著住夏天衫，朋友即刻買冬天衫比佢。我見佢嗰時, 佢到咗臨時屋兩日，個人瘦到皮包骨。幾個月之後再撞番佢，身型已經回復咗唔少，無初初咁緊張，仲有番笑容。當日另外見到一個十八歲後生仔，體型壯健，好乖仔，仲寫得一手好嘅毛筆書法，原來佢係玩開徒手健身。其實佢哋嘅臨時屋都有d規矩要守，例如用完廚房要清潔好，食物唔可以亂擺，出入要閂好門，如果做得唔好要罰抄。老實講，呢d我喺自己屋企都未必做到。我見過佢哋嘅生活態度又幾認真喎！由於尋求政庇嘅後生仔女大多數有被捕、被虐打、得唔到家人支持，而且政庇期間頭一年都唔可以做嘢，又無錢去街，，加上創傷後遺症，唔少都要尋求註場社工幫助。我哋除咗資助臨時房屋租金同聘請社工開支外，仲有一部分錢係用嚟支付佢哋申請政庇嘅法律服務。
至於獎學金方面，我哋已經收到八十幾份申請，正在準備篩選同埋了解申請人情況。多得香港大學陳文敏教授、杜倫大學副教授江瑞婷 、NHS顧問醫生馬仲儀同埋克尼華人社會服務中心經理林懷耀先生幾位有公信力嘅做評審，預計7月內會公布結果。由於香港嚟嘅新移民要比俾國際學生學費，唔少有心喺英國求學嘅學生家庭都未必有足夠財力可以負擔。我哋希望能幫到8至10個學生, 每人最多五千鎊，輕輕扶一把，減輕負擔。
我哋一直資助以社企形式運作的Find A Good Boss，佢地專門幫香港人喺全英國搵工、配對工作、執好份CV、教面試技巧等，卓有成效。
今次「千人接力心連心」嘅活動，係希望每人以20鎊為單位，揀一條自己屬意嘅人鏈，或者自己同志同道合嘅人創立一條鏈，捐得愈多人鏈就愈長。每人捐款時，可以留底自己嘅心聲，同時邀請十個八個親朋戚友加入。咁樣好快，我哋就可以「個十百千人傳人，薪火相傳心連心」，將我哋同後生仔女嘅心連起嚟。我哋希望由修咸頓連到去卡迪夫同布里斯托，再連去倫敦，上諾定咸，連埋伯明翰，連起曼城，再去埋愛丁堡同格拉斯哥，將全部在英香港人連起嚟，壯大聲勢，互相扶持，為下一個大行動熱身。
「千人接力心連心」網址:
