二次移民 - 由台灣到英國

作者：Ada

同大部分拎BNO Visa嘅移英香港人唔一樣，我曾經喺台灣住過三年，因為台灣政府嘅原因，我移民台灣嘅計劃落空，最後選擇左英國落腳，希望今次可以順利拎到身份，大家一齊加油！

今次同大家分享一下喺我搬嚟英國2個月，同台灣喺生活上嘅分別。

1. 駕駛態度

大家都知道台灣嘅電單車密度係亞洲之冠，不過唔係每一條路都有電單車同行人專用嘅道路，所以道路規劃上會比較混亂。馬路上嘅三寶(三寶意思請自行Google)多不勝數，每一日開車，我同屋企人都會好激氣，路上亦都發生過唔少狀況，我喺台灣住頭一年因為交通事故入過三次差館，ps有兩次我架車都係停車狀態。

同台灣嘅朋友傾偈嘅時候，都會用呢一個話題講笑，大家都同意就算平時係幾咁和善嘅台灣人，上到架機車或者四個碌，都會覺得自己係車手。

喺英國我地亦都好快喺落地之後買咗車，嚟之前聽好多人分享英國嘅司機都好禮讓。暫時我哋覺得都大家講得冇錯，係呢一度我哋揸車非常之放心。除咗入大城市會有喺香港揸車嘅感覺，平常嘅小鎮，甚至高速，揸車都係好舒服，響安真係少之有少。

2. 食物選擇

台灣嘅美食當然係唔少嘅選擇，對比香港可以用一個相宜嘅價錢食到高級嘅食材，食一餐和牛燒肉都只係幾百蚊港紙已經飽到捧住個肚。

因為台灣有好多平價選擇，買餸煮飯對比下比較貴，所以好多台灣人都選擇出去食外賣。

嚟到出咗名嘅美食荒島英國，我地都有出去食飯，不過cp值真係一般，試過喺一間Cafe叫左碗湯，嗰個味道係我呢世人未試過，亦都唔想再試，佩服英國人嘅味蕾。當然都有唔錯嘅餐廳，不過為咗荷包着想，我地大多數都係自己煮飯，對比過買餸嘅價格，出奇地係台灣同英國呢方面嘅物價差不多。最有趣嘅係，喺英國可以買到嘅港式/中式食材，比我喺台灣可以買到嘅更加齊全，例如腸粉，豆腐花。當然價錢上三級跳，不過當你好思鄉嘅時候都可以懷緬一下。

3. 醫療

台灣嘅健保係令好多台灣人驕傲嘅制度，以前有唔舒服嘅時候，醫生可以好快安排專科檢查，每一年仲可以幾十蚊港紙做一個簡單嘅身體檢查，包埋心電圖，超聲波，驗血同埋驗尿。當然公立醫院攞籌睇症會比較耐，不過相比起香港已經係天堂。

英國暫時我就未睇過醫生，試過有一次皮膚有問題，打電話想約GP，姑娘回覆我要個半月之後先可以睇，所以放棄咗，直接買成藥。不過上網有睇到好多分享，如果有大病，英國都會照料得好好，希望我同大家都唔需要親身感受，身體健康就足夠！

今次分享住咁多先，下回再續！

*本文章為作者個人意見及經歷，本站對文章內容不負任何法律責任，亦不代表本站立場，讀

者應自行判斷內容真實性。