港英連線跑

作者：艾雲膏

上星期日無意中參加咗一場【港英連線跑 - 倫敦皇家公園團跑】，同一班香港跑友一齊喺倫敦市中心幾個公園跑咗10公里，都真係幾好玩。估唔到渣打馬拉松喺香港舉行嘅日子，居然有個咁嘅團跑節目，可以滿足我哋嚟自香港呢d腳痕技癢嘅跑友。

嗰日天氣都唔錯，雖然陰天無陽光，氣溫大概5至7度，但對於長跑其實好適合，應該比起香港當日天氣24度，濕度95%對跑手嚟講好得多。我哋10:00 喺 Green Park小食亭集合，一衆跑友都好準時（其實跑友一講到有得成班人一齊跑就一定準時）。大約10:15起步，由Green Park跑去St. James Park，經白金漢宮，海德公園，最後以Kengsington為終點，全程十公里。

我哋23個跑友事前其實互相唔認識，只係網上有信息話可以一齊團跑，已經定好路線，免費之餘又唔駛報名，仲定埋速度大約6.5分鐘一公里。咁睇落無乜壓力，來去自由，又可以同香港跑友跑番轉。仲可以襯渣馬喺香港舉行，我哋喺倫敦一齊跑番轉都唔輸蝕，算係止得咳，頂吓癮，聊勝於無。組織者其實落咗唔少心思。雖然只係跑市中心嘅幾個公園，但沿途風光，文物建築，仲有英國人星期日喺公園嘅活動都成為我哋跑步享受嘅風景。見到公園有人騎馬、踩單車、跑步、集體做運動、湖邊有鵝仔、白金漢宮前擠滿要睇御林軍換班嘅遊客，感受到呢個國際大城市充滿活力，好有氣氛。

當日跑友中不乏有喺香港跑過全馬半馬，個個都唔少嘢。其中認識咗一位年輕心理學博士，她由香港嘅嚟咗英國只有兩個禮拜。同佢一路跑，佢一路觀察周圍事物，仲話好開心有機會一口氣認識晒幾個公園。跑到Kensington之後，影完全體照，原來佢哋仲有一個【倫敦跑友】嘅群組，大家都第－時間加入，第日可以同其他跑友夾吓跑番轉。另外，佢哋仲係【HKers Run UK / 跑馬去英國】嘅子Group。其他城市有類似香港跑友群嘅包括曼城、伯明翰、雷丁等。大家有興趣不妨搵搵，睇吓有無機會參加團跑。

希望好快我哋可以全英國唔同城市嘅香港人牽頭，一齊舉行10公里甚至馬拉松比賽，延續香港活力同精神。 

*本文章為作者個人意見及經歷，本站對文章內容不負任何法律責任，亦不代表本站立場，讀

者應自行判斷內容真實性。