21個月・英倫生活隨想

作者：艾雲膏

英國比我想像中容易適應，其中一個原因係因為我一落地就要開展新業務。因此，比以前喺香港仲要忙，生活上感覺好似無縫對接。

倫敦嘅地鐵巴士同香港差唔多，巴士服務同班次比香港仲密仲好。雖然這兒交通費比較貴，但由於喺倫敦60歲以上喺zone 6以內搭巴士、地鐵同火車都係免費，加上交通實在太方便，所以喺香港成日鍾意揸車嘅我都無咗買車嘅意慾，一於做番個環保份子。

我嚟咗呢度認識新朋友比香港容易同埋多。呢度香港人個個都好願意認識其他香港人，關係比喺香港認識新朋友親切得多，交淺言深，鷄啄唔斷係好正常。

我住緊呢區Finchley係猶太人區，好安全。我住嗰座大廈左右隔離都係猶太人，出入主動同人打招呼，主動攀談一下好容易，好輕鬆。佢哋其實都好想同鄰居傾吓偈，大家認識吓。只要你作為新住客主動些，肯定有回報。當然，倫敦好似聯合國，有嚟自世界各地唔同嘅人種，好多時真正英國白種人係少數。所以最好留意吓其他種族嘅新年日子，例如猶太新年、印度新年、其他宗教風俗都係好事。

嚟咗咁耐，平日做嘢同日常生活都識咗唔少本地人，真係感覺唔到有歧視。當然，有些人可能咁啱嗰日心情唔好、脾氣差些或者對人無乜禮貌，其實喺邊度都會有啦！倫敦人真係好有禮貌，汽車多數讓人過馬路，成日見到落巴士時，有乘客會大聲講Thank you。

好多時同本地人交往，一講係香港嚟，佢哋都大概有印象香港發生乜嘢事，點解要移民嚟英國，而佢哋都會對我哋好友善。之所以對我哋咁友善，其實要多謝早年移民嚟嘅香港人。佢哋絕大部份勤奮工作，奉公守法，安份守己，好多第二代已經係專業人。

上星期Rishi Sunak正式接任首相，卻令我想起，點解佢唔係香港移民嘅第二代呢？早年嚟英國嘅香港移民，大多數淨係專心家庭生意或者工作，無關心英國政治，無參與本地政治。見到英國內閣閣員有幾個都係唔同種族嘅第二三代，我裡面有份期盼。我哋呢批新嚟嘅香港人個個有學識，甚至喺某些崗位都係獨當一面，有唔少好年青，加上經過三年日日政治洗禮，其實已經好成熟，對政治一點都唔陌生。好期待大家一齊去認識英國政治，而更希望我哋年輕人和下一代，幾年後會做council member甚至國會議員，貢獻社區同呢個國家。

係我屋企傍邊嘅農場，𥚃面有三隻又乖又可愛嘅小黑豬！

*本文章為作者個人意見及經歷，本站對文章內容不負任何法律責任，亦不代表本站立場，讀者應自行判斷內容真實性。