三年倫敦生活之我見

作者：艾雲膏

嚟咗英國轉眼啱啱三年，想做一階段性總結比諗緊嚟英國嘅香港人多一啲頭緒，或者可以幫你坐言起行，萬里之行始於足下。已經有好多香港KOL講過移民英國好多大道理同實務嘢，我不如講吓啲日常生活細節同觀察，可能你會更加有回響？！

同英國人講嘢，大部份時間會首先講天氣。而英國人對英國天氣，就好似香港人九七後講起特區政府一樣，有彈無讚。Oh, UK weather is miserable (大致係話英國天氣好差，準確啲講係英國天氣好淒慘！）。其實我覺得英國人淨係記得冬天日短夜長（最早下午三點半天黑），又凍又落雨嘅日子。佢哋好無良心，好似唔記得咗一年有五個月時間，日長夜短（最長日照由朝頭早四點幾天光到夜晚差唔多十點太陽先落山）。而倫敦嘅冬天又唔係咁凍啫，通常朝早零度上下，日間幾度，著件羽絨就可以。冬天大部份時間無雪，有都好少，今年冬天倫敦只係落過一兩場毛毛雪。計我話咁嘅冬天天氣，對於喜歡打邊爐嘅朋友就多好多借口成日打邊爐。認真，天氣ok㗎！

我知道唔少香港人好似我咁，唔鍾意擔遮著雨褸，我成日同人講我跣水嘅。以我觀察倫敦人有一半明明落緊雨出門，大人細路都唔擔遮又唔著雨褸。冬天就只係著件有帽嘅羽絨，或者甚至只係著絨褸，揼到周身濕曬都由得佢。有啲猶太男人喺落雨天就係帶頂氊帽，著件絨褸就成個紳士咁昂首濶步雨中任佢行。 

搬嚟英國，即使落腳倫敦，只要你唔係要住Central London最核心地段，你都可以買到比香港平三四成嘅住宅。老實講，倫敦人好識嘆，住得好有質素。喺倫敦，好多都係family house（town house, terrace house, semi-detached 同埋single house ）都係兩三層，連埋一個起碼幾百呎至過千呎嘅後花園，有啲有埋前花園或者將前花園改為泊車位，有啲仲有埋車房，兩至三個睡房，甚至係永久業權，可能仲有儲物室，屋頂仲有閣樓。當然，有個小花園真係增加好多生活情趣，例如種吓花種吓果樹（蘋果、櫻桃、西梅、杞子、無花果…比比皆是）。間唔中請人返嚟屋企坐吓食飯，招呼朋友喺花園開個party飲吓酒，又或者BBQ。又或者朝早喺花園兩公婆食早餐、睇吓書、曬太陽、工作，都可以好寫意。 

另外喺倫敦每一個住宅區附近必定有個大公園，好多人去散步、跑步（呢度興park run)、踩單車、放狗、瞓草地、野餐…乜都得，自由自在。唔會好似喺香港啲公園咁唔准呢樣唔准嗰樣，仲成日比啲管理員𥄫住晒。 

我之前同大家講過，我喺倫敦西北面Hendon買咗間半獨立屋，1月25號已經搬咗入去。上幾個禮拜清理花園同車房雜物，結果有大量家居雜物、樹枝樹葉、木材要丟棄，唔知揾人車走抑或要自己攞去垃圾站，如果做唔啱又會唔會比人罰。之後，上網發現原來每個區都有一個大型垃圾回收場。只要自己開車去（或者叫van仔車book時間車去），將各類垃圾自行掉入各個分類環保斗就有專人處理，輕鬆方便，非常惠民。諗起喺香港掉大型垃圾就唔知點算，有時仲好似做賊咁，放喺垃圾收集站有時都會比市政清潔工鬧，十分受氣。 

順帶一提，我哋商量緊同聽緊朋友經驗，了解緊是否喺我哋後花園種韮菜（第日係咁起勢割）生菜、種果樹、養蜜蜂收集蜜糖、養鷄生蛋、仲有魚池種西洋菜（都唔知做得幾多樣） 。總之，嚟到英國，政府對人民好人性化，你會感覺到政府會好為你嘅日常生活設想，唔會當你係賊。喺英國嘅生活質素同香港真係無得揮（fight)。

你想要繼續搵錢喺高壓之下無生活無自由？定係要有番自己家庭生活過自由安穩日子？

*本文章為作者個人意見及經歷，本站對文章內容不負任何法律責任，亦不代表本站立場，讀者應自行判斷內容真實性。