Charity Shop 做義工

作者：一個响英國嘅404

呢個 topic 唔係好見有人分享，但其實我覺得幾值得畀新到步嘅香港人參考下，所以投稿移英港鄰。

大家响大街小巷都一定見過唔少Charity Shop，一啲好出名好大間嘅又有，蚊型嘅又有。我之前因為想搵啲義工做下，識下唔同嘅人，响唔同嘅義工範疇裡面我揀咗Charity Shop嘅 Shop Volunteer，做咗幾個月。對於完全無零售經驗甚至無對過客嘅我，其實係幾好玩嘅，因為可以經歷一個完整零售鏈嘅過程。由收貨——接收街坊捐贈，處理貨物——將捐贈項目分類、整理、定價、上架，整理店門——執整客人整亂嘅貨、打掃、寫字宣傳速銷，應對客人要求——幫客人拎架上嘅貨、話佢知邊度試衫、電子用品就即場試，到畀錢——現金定碌咭、要唔要袋。分分鐘做普通零售都未必有機會接觸到前面果部分，但Charity Shop就有機會由收到件貨到賣出去呢個過程都一手一腳包辦。

街坊捐贈嘅物資真係林林總總，最常見都係衫褲鞋襪同書籍，但玩具、杯杯碟碟、奇怪嘅擺設都唔少，甚至有啲同店長加埋其他義工一齊研究完都唔知係咩嘅野都收唔少。不過唔好諗住「捐贈」兩個字，啲街坊就處理得好好咁畀你。其實超過一半損贈者嘅心態，都係當你收集垃圾嘅地方咁，一大袋衫入面可能有三四成都霉霉爛爛，如果書本嘅話，我處理過唔少連封面都甩晒嘅舊書，甚至裡面夾住糖紙勁污糟嘅都有，DVD 又收過盜版。咁呢啲貨當然係要搞一輪，先至可以賣畀客人，至於唔賣得果啲，其實Charity Shop係要另外畀錢搵人回收。好心地嘅捐贈者就會入鋪頭講聲捐咩，再交畀義工手上先走人，但真係好多人係就咁開鋪前丟响門口。有次落大雨，咁我一返見到鋪頭門口外面成堆濕晒又污糟晒嘅衫，其實真係好浪費。啲衫分好之後仲要 steam 埋先叫整理好，呢個時間就係定價同貼價錢牌，咁衫褲鞋襪呢啲通常有個參考嘅，鋪頭有張表寫住男女裝便服、正裝大約咩價錢，書呀、DVD呢啲就劃一收費嘅，£1一個或者幾個item咁，我果度通常店長會親自搞晒定價所以我地義工只係負責貼label或者釘個價錢牌落件衫。咁頭先提過好多玩具甚至謎一般嘅擺設，因為店長未必有知識，所以好多時會見到佢亂定價，有時啲好珍貴嘅野定到街市價，但有時啲無價值嘅野就定到貴一貴。所以如果鐘意儲珍貴野嘅人，其實得閒行下啲Charity Shop可能會搵到寶藏。

之後就係管理店面喇，店長有時會畀我諗下啲corner點用，擺咩貨啱，咁我之前二月果陣試過建議整個情人節corner將啲愛情電影、情歌CD放埋一齊，又試過幫手响櫥窗塊版寫字吸引人買某啲野，其實幾得意。啲貨推晒出來店面，下一步就梗係應對客人啦，咁呢樣同普通零售就差唔多(雖然我無做過零售)，都係答下佢啲價錢，幫佢攞啲擺得高或者鎖起咗嘅貨咁，其他義工仲會同啲客吹下水傾下計咁。咁Charity Shop 嘅客人通常唔會係豪客，好多都會講價，呢一部分真係見盡人生百態，有啲就會特登搵啲貨品嘅瑕疵，例如件衫有個細到睇唔到嘅窿，去議價。有啲就會動之以情，同你講佢好窮，身上無錢，淨係想買啲野畀佢個小朋友之類。因為我做得唔耐，所以遇到呢啲都係畀店長處理，而觀察店長點處理又係學到好多野。

Charity Shop 顧名思義，啲收益扣除成本後會撥捐畀佢服務對象，大部分响個組織個名已經知道佢捐畀咩人——癌症研究啦、長者啦、小童啦、動物等等…… 其實呢樣我做之前都好struggle，因為同香港一樣，好多NGO都有唔少負面新聞同埋極高行政費，有啲個總部大樓仲靚過啲豪宅，見local都有唔少批評。所以搵之前盡量睇下佢啲月刊/年報，好多都會disclose自己捐咗幾多出去，咁資訊太唔透明或者個捐款比例太唔合理果啲，就避開佢咁。

呢篇純粹分享做Charity Shop 嘅Shop Volunteer會接觸到啲咩，當然視乎店鋪大細，我講嘅野未必包晒全部，例如傢私我做果間係無嘅。其實香港人得閒嘅可以試下做下Volunteer，就算唔係Charity Shop，都有好多唔同種類嘅，例如圖書館、foodbank、citizen advice 等等。一來可以識下唔同嘅人，二來做義工都叫幫到啲有需要嘅人。

點解想投稿呢篇係因為真係好少見啲網上香港人群組會講做義工嘅經驗，所以如果有興趣想試嘅人應該好難search到其他人經驗分享，所以希望呢篇成為其中一篇search到嘅資源。有時見好多群組每日分享嘅就係飲飲食食、購物、歐遊、去餐廳一定要叫3 courses meal加野飲呢啲全部都同使錢有關嘅話題，都希望可以睇多啲關於義工或者社區活動嘅分享。

如果你都有Volunteer經驗，或者覺得我講嘅野有錯誤（畢竟我只係做咗幾個月），都不妨分享一下！

*本文章為作者個人意見及經歷，本站對文章內容不負任何法律責任，亦不代表本站立場，讀者應自行判斷內容真實性。