聽都未聽過 - 自由城市運動現在進行式

作者：Victoria Harbor Group CEO 高廣垣

當呢個世界亂七八糟，以巴俄烏戰爭持續不休；當西方民主自由陣營同獨裁極權集團喺世界各地鬥得你死我活有你無我之際；當有人開始懷疑資本主義民主制度衰敗而提出東升西降，試圖取而代之嘅時候；當昔日最自由開放大放異彩嘅香港被打壓得七勞八傷，一沉不起甚至令人覺得已經無法挽回之時……，其實喺呢個地球上十幾個地方已經靜靜哋「起革命」。一班為數不少來自世界各地嘅有識之仕，正在推動一個你聽都未聽過，諗都諗唔出嘅運動 - 自由城市運動（Free City Movement）。

我喺過去三年由於發起同推動「國際特設城市」（International Charter City) 嘅建立，我開始接觸到以自主自由方式嚟建立同管理新城市呢個圈子內一啲核心人物，大家志同道合、相逢恨晚、一拍即合。三年前當我提出要建立國際特設城市時，好多人覺得類似Tom Cruise 嗰套戲個名咁mission impossible。我間中亦感覺自己處景有啲似梅艷芳嗰首歌咁「孤身走我路，獨個摸索我路途」，有時都會覺得有啲「寂寞滿心內」。好在有一班有共同信念嘅同事，同埋喺世界各地有一百位來自各行業嘅精英自願者加入「在我耳邊輕鼓舞」，同行呢段未有前人走過嘅路。

最近我獲邀參加10月14-15日喺布拉格舉行嘅 Free Cities Foundation Annual Conference (自由城市年會)，我先至知道，喺呢個世界上有近乎瘋狂想法嘅人不只我一個，而係有成班有心人分佈喺世界各地。兩日嘅會議，有嚟自34個國家300多人參加，都係喺度為自己構思或者實行緊嘅「自由城市」、「國際特設城市」、「私人城市」及「國際城市」分享想法同進度。呢批自由城市推動者或者叫做 libertarians （自由主義者、自由論者）真係好天馬行空，大部份主張係買啲偏遠土地，或者人煙稀少嘅小島，按照自主管理原則從新規劃發展新城市新社區，其中最有創意係建議喺公海建築海上城市（seastead）。至於買地建立新城市比較多喺發展中國家例如洪都拉斯，包括已經部份建成嘅Prospera商業城市同埋Chiudad Morazan工業城市。

最有趣係一塊只有7平方公里面積（香港土地面積係1,100平方公里）位於克羅地亞同塞爾維亞之間嘅一塊完全無權屬嘅小島上，建立咗一個新國家叫Free Republic of Liberland。該國總统過去幾年，周遊列國，推動宣傳該國護照，已經有730,000人申請成為電子公民，每年喺呢個「小國」舉辦唔少活動。仲有喺美國New Hampshire 嘅 libertarian community、英倫海峽一個叫Sark小島、喺挪威一條小村莊Liberstad等都係倡議自己城市自己管，由發展商定立規矩、管理模式，公開透明比居民參與，同居民訂立social contract 甚至自己組成政府實行自由方式嘅自我管治。

呢啲天馬行空、極具創意同勇氣嘅自由城市發起人，大部份係對世界上現有城市同政府管治不滿，又或者想遠離任何政府管治而喺公海建立自己國家。其實，喺會議期間，我已經聽到比較一致嘅聲音，話要將自由城市發展成一個全球運動，向全世界推廣。 我經過呢幾年推動國際特設城市嘅過程，從中知道世界上有好多國家同地區，一直都有實行一國兩制，根本唔係有乜開創性，好多都行之已久。例如法國同英國以及其他部分歐洲國家嘅海外屬地，行之有效，亦無年期限制，宗主國亦唔會夾硬迫屬地政府做一啲違反當地人民意願嘅事。相反，好多時宗主國委派嘅總督同屬地政府盡量玩平衡藝術，相安無事，即所謂治大國若烹小鮮。

我好享受嗰兩日會議嘅氣氛，因為大家可以𣈱所欲言咁探討如何遠離政府管治、建國、建立自由自治城市（autonomous city)、digital nomad、global citizen passport ……各種你想得出嘅新意同主張，真正無拘無束。

而且唔係留於空談而係大家都喺度推動，全部都係advocates 同activists。 借用梅艶芳以下嘅歌詞反映呢班想改變世界嘅人嘅澎湃心情：「我要唱出心𥚃譜，我已決意踏遍長路，跟心中拍子傲然獨舞永沒停步，不想管終點何日到。」 

 附上係筆者喺會議中演講關於世界公民護照講稿。而以下係演講嘅video：