希望重燃：申請政治庇護者的獨白

作者： John

2023年10月

各位讀者好，我係 John （化名）。

小弟於大概2年前嚟到英國，目前仍然等候緊政治庇護。嚟到初期乜都唔識，朋友都冇幾個，住政府緊急住宿，無所事事左幾個月。望到身邊朋友開始讀書同有大學收，我自己內心其實都好想繼續讀書學嘢，所以非常羨慕佢地。加上屋企幾代都冇一個成員係擁有過大學學位，我更加想為屋企爭光。同時本人家庭經濟只算係好過基層小小，住緊公屋。可想而知，屋企幾代落黎知識水平都一般，只能夠靠體力勞動搵食。

我嚟到英國係想重新擁有新嘅人生，就係要證明俾港共政府睇，我地呢班曾經係柒婆口中的 ”have no stake in the society” 原來未來係不可限量。所以我膽粗粗都「跟風」咁搵學校睇下邊間收我，最後搵咗3間， 有一間offer咗interview俾我。我當時勁興奮又勁緊張！由於係讀Art相關科目，小弟即刻衝去National Gallery睇畫作同歷史。最後面試非常順利，學校俾我enroll，之後更加喺自己同主任積極爭取下，成功由大學year one讀起 （原本係access to higher education level）。

同時面對嘅係學費壓力。因為係單親家庭，加上屋企幾代都冇人讀過大學，所以家人對我呢個舉動反應係不太支持，屋企亦冇經濟能力支持我。最後係自己俾左之前儲落嘅儲蓄、再借左幾位有心人資助，先能夠順利完成第一學年。

第二年亦面對同樣問題，由於無法工作，所以我個諗法係讀得一年係一年。當時遲遲交唔到學費，不斷收到學校電郵，問幾時可以繳付學費；學校電話都不停打過嚟- 我完全唔敢聽，因為真係冇錢俾。自己完全無辦法安心上堂，每次入學校都有壓力，唔知enrolment team會唔會嚟課室搵我。好在幸運地認識咗「在家基金」嘅Samuel！有一次做完活動義工後，Samuel知道我呢個情況，好快就安排見面了解我嘅生活狀況，然後好快就叫我唔駛擔心學費 -「在家基金」會資助我繼續學業。最後「在家基金」 承擔大部分學費，再加另一朋友資助，小弟嘅第二學年先可以順利完成。

在此，我衷心地感謝「在家基金」幫助我解決學費煩惱，令我安心專注學業，而且第二學年嘅成績比第一學年更好！在此我更加要感謝所有捐款俾「在家基金」嘅朋友。我地等候緊庇護嘅同路人喺生活上實在有好多難關要面對，只能夠說小弟算係非常幸運嘅一位。喺緊急住宿下都完成咗將近2年學業，諗下都覺得係奇蹟。同時，我相信仲有好多庇護朋友仔需要「在家基金」嘅幫助，所以希望各位有能力之士可以支持和介紹「在家基金」（At Home Foundation）俾身邊朋友，只要人多，哪怕每人只付出些少，已經可以陪同有需要嘅朋友仔一起渡過難關。

在此再一次感謝「在家基金」及各善長。係你地重燃我的希望。You light up my life！ 無限感激！！