我哋鄰居全部猶太人 - 好驚定好 friend ?

作者：艾雲膏 

最近以色列遭到哈馬斯恐襲，以色列反擊行動受到國際社會高度關注，仲引起世界各地不少支持巴勒斯旦人嘅抗議。相反，好少有群眾組織遊行示威支持以色列或猶太人。哈馬斯仲喺前幾日呼籲全球穆斯林向西方國家發動聖戰，氣氛一度幾緊張。 

我哋住緊嘅係猶太人區- Finchley Central，好近 Golders Green。我哋住幾層樓高嘅大廈，左右隔離樓上樓下幾乎全部都係猶太人。前幾日喺香港人社區群組有人提醒唔好去猶太人區，話避之則吉，驚有恐襲。我自己正正住緊呢啲猶太人區，究竟應唔應該驚？正所謂君子不立危牆之下，駛唔駛暫時搬去住酒店避吓風頭？ 

我哋之前住過Golders Green上面嘅Hampstead Way，亦係猶太人區，所以對猶太人區比較熟識，亦都識咗唔少猶太人鄰居。我比較喜歡住猶太人區，因為街道整潔乾淨，安全系數比較好，鄰居亦比較願意打招呼傾談甚至做朋友（當然你要主動啲喇）。最令我欣賞係每個周末條街有好多著到靚笠笠嘅猶太人去教堂，猶太拉比就著得好誇張，有啲仲帶大高帽。見到佢哋大人細路路上相遇攀談，成街都係猶太人，別有一番風味。有時候坐巴士同地鐵仲見到啲猶太學生哥喺度讀希伯來文，簡直令身為香港人嘅我好感動，心諗唔知呢代香港移民嘅後代會唔會承傳到香港文化甚至發揚光大。  

講番呢兩三個禮拜其實喺呢啲猶太人區一切如常，鄰居如常出入，街上行人車輛無少到，學生哥一樣照常返學。我哋琴日仲成班香港人同隔離座一位90歲意大利裔嘅猶太鄰居老太太去Colindale嘅俊明軒飲茶傾偈，有講有笑。閑談中都有提到哈馬斯恐襲，而老太太喺以色列嘅兄弟嘅孫女喺呢次恐襲中被殺。雖然係咁，但大家都無提及驚唔驚喺自己住緊個度俾人恐襲。

飲茶最後例牌叫甜品，老太太話佢自從九歲之後就唔食甜品 。因為當時戰亂，被迫住喺果醬廠避難，一日三餐只可以淨係食果醬，無麵包無其他嘢送，如是者食足三個月，佢同佢兄弟從此討厭食甜品。 除咗呢位精靈老太太外，我哋仲認識隔離單位95歲以色列阿伯。我哋亦經常同佢去飲茶，而佢仲可以一個人每個月去世界各地旅行。呢兩位猶太老人家都好好彩無入過集中營。而我哋認識嘅另外一位101歲匈牙利猶太老太太鄰居就無咁好彩，佢丈夫兩次入集中營，佢自己入集中營時先至15歲。聽佢講集中營經歷，非常絕望無助，簡直人間地獄。 

猶太人經過二千多年苦難，經常被驅逐迫逼，居無定所，流散世界各地，但係佢哋好有立國嘅決心。猶太人除咗以色列之外，喺世界各地都會聚居於某啲社區，方便𨒂伸自己嘅宗教、語言、文化等。呢方面做得好成功，而佢哋做生意同科技方面亦做得好出色，真係有好多嘢好值得海外香港人學習。 

今次以巴事件，住喺猶太人區嘅我會想起2019年有啲外國人睇新聞覺得香港好亂，好似好暴力，唔敢嚟香港。但其實當時自己喺香港仲經常參加遊行示威，好想話比佢哋知香港即使有示威其實都仲係好安全。相反到咗今日，我就勸啲本地英國人同其他外國人唔好去香港，因為一切令香港成為東方之珠嘅元素都被摧毀咗，變晒！

（附上電子書「猶太國家」，作者Theodor Herzl 於1896年出版，之後翻譯成英文版本。）