Run 2 Free Hong Kong：健康、有意義 、好玩

作者：艾雲膏 

終於到咗9月30日，我要跑今年第三個半馬，就係Run 2 Free Hong Kong，中文個名有啲長不過意思幾全面，「中秋河畔慈善馬拉松」。感恩嗰日天氣好好，一早食咗兩碗飯，因為中午跑緊嘅時無得食飯。大約朝早9:30到達京士頓火車站，參加全馬起步禮。四個全馬選手已經一早到咗，大家傾幾句，每個跑手綁上黃絲帶，合照之後佢哋就出發。 

我就要開車送一位義工去Putney半馬起點，再將車開去終點，之後再坐地鐵去返半馬起點。當日因為係星期六，有啲塞車，所以時間幾趕，幸好12:30前準時趕到半馬起點。當時全馬跑手已經到咗半馬起點，似乎狀態都唔錯。當時發現有幾個年輕人臨時加入，我哋都無所謂，只不過預備咗嘅黃絲帶數目無多，只能夠比預先報名嘅跑手綁喺身上。我哋五位半馬跑手連同四位已經跑咗21公里嘅全馬跑手，加上幾個臨時加入嘅年輕人浩浩蘯蘯由Putney Bridge出發。 

其實呢次路線設計，由京士頓全馬起點開始，大部份路程係沿住泰晤士河跑，所以沿途可以一路跑一路欣賞美麗河景。雖然所有跑手有前有後，但大部份時間都可以大致一齊，因為之前我哋已經講明速度約為每公里七分鐘左右。 跑到十公里起步點Waterloo嘅時候，十八位十公里跑手已經到齊同埋已經綁好黃絲帶，三十多位跑手一齊合照，振臂一呼向終點海德公園傍邊嘅St. John’s Church 出發。之後嘅路程就比較擠迫，其中有啲路段例如London Eye附近，簡直好似以前旺角咁，唔好話跑，連行路都水洩不通。

其實今次慈善馬拉松亦都有五公里步行，不過佢哋就喺海德公園內起步，跑手就唔能夠經過佢哋嘅起點同佢哋一齊出發，否則大家到終點時間就會差好遠。 喺下晝3:30所有跑手陸陸續續跑到終點，而步行者亦都差唔多到，同當初大會預計時間差唔多。我聽到終點有好多人喺度喝采歡呼，立即跑快幾步衝刺，輸人唔輸陣。 

今次馬拉松籌款最開心有兩件事，第一係到達現場後，所有跑手將自己黃絲帶綁上鐵閘上面，寓意Set Hong Kong Free「被擄得釋放」，大家都好踴躍好開心😁。另外就係所有跑手為細葉榕同在家基金籌到24,640英鎊，係籌款目標嘅82%。 

呢次馬拉松最好係，終點喺「英倫中秋聚」市集，跑手同步行者都可以填番飽個肚，飲飲食食買吓嘢同啲檔主同啲friend傾吓計，唔駛一跑完就散band。咁樣安排有啲似9月3日倫敦Big Half半馬，終點場地根本就係嘉年華。 
希望出年再接再勵，喺曼城、倫敦各搞一次，能夠有更多人參加，籌到更多善款。