Life in the UK test 熟讀不為難

作者：豆苗

自從上個月做完Life in the UK Test之後，唔少朋友都問我究竟呢個test難唔難，需唔需要準備，要花幾多時間準備呢？對於未做過呢個test嘅人來講，聽起上來好似好有挑戰性，不過我每一次嘅答案都只有一個，只要你睇過一次官方提供嘅溫習材料，你就一定冇問題！

筆者喺英國都已經居住左超過10年，起初我仲以為住咗喺度咁耐，應該唔需要任何準備都能夠容易過關。不過，當我喺網上做試卷之後就發現其實我需要去溫習一下考試嘅材料。好多內容其實都係常識，但是始終都要熟習一下，所以我就買咗官方嘅材料，三個月有效嘅網上教材，大約九鎊，但睇過幾次之後，基本上所有要考嘅題目都已經包括喺裏面。喺英國讀過書你就會知道，好多時候英國嘅考試題目唔係要去為難你，只要你讀過一次，知道考試內容其實就可以過關。

考試內容大概分為五個部份：英國嘅核心價值；英國地理；英國歷史；英國社會；英國政府。當中好多，其實你有留意身邊所發生嘅事已經知道。不過我覺得最具挑戰性就係關於運動、文化等等，其中有唔少題目係問英國運動員嘅名字、藝術家嘅作品、甚至歷史事件嘅年份。不過你唔好俾佢哋嚇親，只有你讀過一次，練習教材裏面嘅試題，基本上都會合格。再加上考試有選擇題，你對內容有印象就唔會難到你。

呢個考試難度唔高但都要花時間去準備，我用咗大概三日（每次兩個鐘），再用多兩三日時間去做練習。實際上考試嘅時間，其實都只不過係10-15分鐘，首先，你需要根據編定嘅時間去到考試中心。到達之後就會有工作人員去檢查你嘅證件，同埋用金屬探測器睇吓你有冇違規用品，有啲似喺機場過關。的確，好幾年前英國有媒體報道考生用不同方法出貓，甚至發現有人用耳機聽指示。當你過咗呢幾關，你就會進入試場，以電腦作答問題。答完問題之後你就可以離開，半個鐘後就知道係咪合格。好好彩，我亦好快知道結果，順利合格！