英國揸車🚗 - 估佢唔到之一🤪

作者：艾雲膏

我嚟咗英國兩年半有多，因為已經登六，倫敦zone 6 內搭巴士、地鐵同火車都唔洗錢，而且倫敦交通完善，四通八達，所以一直都無興趣買車。直到最近要去吓倫敦以外其他地方，先買咗部車，日後可以揸吓長途。

有兩個完全相反嘅揸車經歷值得喺度同大家講，先分享第一個經驗。

最近有屋企人嚟探我哋，佢哋走嘅時候我梗係要揸車送去希斯魯機場。由於佢哋用航空公司家屬機位，所以上唔上到機要踫運氣。咁啱連續兩日我車佢哋去都上唔到機。

當時為咗上落方便，佢哋要逐班機等位，所以我揸車去咗短暫停留區short stay。當時我睇到告示，只要駛入去就要收£5。但當我放低佢哋之後，我睇極都睇唔到去邊度比錢。以為駛出去之後就會有閘口，點知都無，於是唯有打道回府。如是者連續兩日都係咁，𢲷晒頭之餘之後又唔記得咗件事。直到兩三個禮拜後，收到希斯魯停車場寄嚟罰款單兩大張，承惠£40一張。我睇完之後覺得好唔妥，明明唔知點樣比錢，變咗話我逃票，條氣有啲唔啹！

於是我利用佢哋嘅網站嘅上訴選項，講出我嘅理由 - 即係唔係唔想比，係唔知點比。我老婆話嘥氣啦！不過佢知道我喜歡爭取吓，拗吓啲鷄毛蒜皮芝麻綠豆嘅小事，有時得有時唔得。我就認為將自己實際情況同佢講吓，無壞，事實係咁，得唔得無傷大雅。反正我當生活情趣，亦都試吓英國嘅practices。我一直奉為金科玉律、最推崇備至嘅就係我老豆教落（唔係佢創作）：「不作無聊之事，何以遣有涯之生？」

之後大約一星期，收到佢哋一個回覆，話基於我嘅理由申訴唔成功，但佢又話佢哋可以接受我交番£5，唔駛罰款。我當然𦧲飯應，即刻鎊（唔好兩頭望）。之後我諗，如果佢哋見到我第二個申訴，理由一模一樣，仲連續兩日唔比錢，會唔會第二個申訴唔過關呢？感恩，過兩日收到同一樣回覆，掂晒。

從呢件事可以感覺英國嘅制度對人民係基於一種信任態度，而唔係好似香港政府咁，當個個市民係賊。其實，英國社會嘅文明程度並非止於此。更令我佩服嘅係佢嘅回覆信後面，仲提供另外兩個選擇（即係居然可以要求連£5都唔想比都得？）。第一我可以向一個獨立嘅上訴機制（POPLA）申訴。另外，佢提醒我，依據法例仲有一個申訴服務（ombudsman，類似香港申訢專員處理行政失當事宜）去化解爭議，但佢哋無參與。

事件至此，我完全體會到做一個有「樽鹽」🧂嘅人民，同做韮菜嘅分别。文明就係文明，落後仲當自己了不起，話乜嘢制度優勢，真係井底蛙，夏蟲語冰之流，無嘢講！