我愛倫敦夏日⻑跑 ！

作者：艾雲膏

無跑⻑跑十幾年，今年終於忍唔住，喺五月參加咗Windsor嘅trail run半馬，前個禮拜日跑咗倫 敦Big Half，真係好享受英國夏天運動嘅機會同氣氛，同香港都幾唔同。 

我第一個鐘意嘅係9月3日嘅Big Half好容易報名，唔洗抽籤碰運氣。我都係之前兩三個禮拜喺啲跑友群組先知道，但係當日目測竟然有幾萬人跑，真係厲害！顧名思義Big Half就係清一色半 馬賽事，無全馬無十公里，跑完就係完成半馬。我好喜歡咁樣，唔會魚目混珠，糾纏不清，濫竽充數（註：我講嘢好容易成地書包🎒）。另外，路線設計一流，由Tower Bridge開始跑去Canary Wharf，以Greenwich為終點，有橋有隧道，有住宅區，有辦公區，水站充足，仲有幾 處有固定灑水可以比跑手跑近啲濕吓身冷卻一下。沿途有好多人湊熱鬧，打鑼打鼓🥁 ，嘈喧巴閉為我哋打氣，我都同唔少大人細路仔跑過時擊掌give me five。更加特別係由起點到終點， 沿途幾乎不停有音樂同歌仔聽，為艱苦作戰嘅跑手增添動力，而我當一聽到Abba同Boney M就跑得零捨有節奏感，仲哼番兩句添，爽 😊！大會另外一樣了不起嘅安排就係一跑完無耐就可以查閱自已成績同埋有網上証書，完成牌同T恤可以自由選擇要唔要，好環保，聽講大會仲有 其他環保概念，包括紙杯之類。以我跑過多年香港渣打馬拉松全馬半馬同10km嘅體會，倫敦 Big Half確實比香港渣馬搞得好好多，跑手得到充份信任同自由，安排方面人性化而又有歡樂氣氛。順帶一提，當日見到有兩個盲人跑手，同教練一齊跑，無特別安排，好尊重有關跑手， 唔知渣馬對視障跑手係點安排呢？ 

至於5月21號喺Windsor（英女皇⻑眠之地）嘅Trail Run就真係好一般，人數大概一二千人，路程圍住條河嘅小徑跑，其實都幾好風景。可惜完成之後唔記得去查吓自己時間，之後就查極佢 哋網頁都搵唔到賽果嘅連結，打電郵比佢哋問極都渺無音訊，當然亦搵唔到證書喇，正一係借咗聾耳陳隻耳。而完成牌竟然件係一塊輕飄飄嘅木牌。下年都咪搞我！ 

今次參加Big Half其中一個主要目的係要睇吓自己跑市區半馬跑成點，因為今個月30日要參加 「中秋河畔慈善馬拉松」，自己未決定跑十公里定半馬。結果我Big Half跑2小時32分，跑得輕鬆，同自己跑前期望嘅只係差兩分鐘，好滿意！ 所以，我的起心肝Big Half當晚已經報咗名，開始咗支持我跑半馬嘅籌款行動。有興趣又想運動吓兼做善事嘅，可以參加「中秋河畔慈善馬拉松」 ） 5公里步行、10公里、半馬或者全馬，為有需要香港人籌款打氣！ 

香港人加油 💪🏻