罷工日搭火車

作者：谷青苗

話說上星期六，英超強隊阿仙奴主場對富咸，阿苗買咗波飛同小朋友一齊去捧場。好多人話坐喺屋企睇電視好過入場，一來波飛好貴好貴，二來電視有旁述，又有慢鏡，可以細心欣賞球隊打法戰術等。不過，場內嘅氣氛，係無可代替嘅。所以阿苗都會間中入場。不過今次唔講波，只講倫敦嘅鐵路交通。

阿苗住京士頓（Kingston），去阿仙奴酋長球場（EmiratesStadium），最快喺搭西南鐵路（South West Railway）火車，再轉地鐵，正常情況大概一個鐘頭鬆啲就到。不過倫敦鐵路職員工會間歇性發動罷工，已超過一年，乘客都習以為常，睇波嗰日，咁啱碰上罷工日，已有心理準備，提早出門。佢地鐵路罷工，唔係全線停駛，只係大幅度減班次，而最唔方便係次次都關閉京士頓站。於是阿苗要先搭巴士去Surbiton站（琵比頓），坐火車去滑鐵盧站（Waterloo）再轉地鐵。

巴士如常運作，冇特別多人。去到Surbiton，只見月台企滿乘客，等咗十五分鐘先有車。上車後車長不斷廣播道歉，話因為太多乘客上落，火車比定原定時間遲咗八分鐘。其實呢度嘅火車誤點係平常事，都冇乜人留意。由Surbiton去滑鐵盧中間只停Clapham Junction（克拉彭交匯處）一個站。到咗呢個站，等咗好耐仍唔開車。原來有個坐電動輪椅嘅老婆婆要上車，車站員工搞咗一陣先搞掂個婆婆上車。開車後車長又再抱歉解釋，班車要遲15分鐘先到，因為用咗啲時間去幫助一個行動不便嘅乘客上車。

喺滑鐵盧站轉地鐵都算順利，愈近球場，就愈多身穿阿仙奴球衣嘅球迷上車，搞到非常之擠迫，不過到出閘時，球迷都十分有規矩咁排隊。由出發到球場，約花了兩小時。

阿仙奴酋長球場有六萬多座位。當日全場爆棚，準時開波，主場球迷又叫又喊，打鑼打鼓，氣氛熱烈，不枉長途跋涉入場。兩個多鐘好快過，跟往大隊人潮散場，趕去搭地鐵，打道回府。點知去到距離地鐵站兩三個街口，已經見到有人排隊入地鐵站。無法子，當訓練耐性，慢慢排。火車車廂雖然非常之擠迫，不過好快就到滑鐵盧站。去到時，覺得好似深夜時段，喺大堂嘅乘客非常稀少。成個站得一列車，聽到廣播，話呢班係最後一班去Surbiton嘅車，於是急步入閘，時為下午6點13分。

最後呢班車，梗係爆滿啦，不過又好彩，比阿苗揾到個位。呢班回程車又係只停Clapham Junction，車長不斷廣播，Clapham Junction月台擠滿乘客，而因為這是最後一班，佢話會比所有乘客上曬車先開，所以呼籲喺車裏面嘅乘客盡量行入車廂中間。（呢句係咪耳熟能詳呢？）果然到Clapham Junction後，好多乘客迫入，大部份人都諒解，唔計較，大家相就，冇乜怨言。

到站後，阿苗仲要轉巴士，返到屋企已是七時有多。今次入場睇波，一共花了九小時，你話值唔值呢？