尋找小確幸

作者：壽司遊樂場

人每日都有1/ 3 嘅時間用喺瞓覺上面，唔知大家喺瞓覺嘅時候有冇啲咩特別講究嘅嘢？例如係軟硬適中嘅床寐或者校到冷氣凍一凍然後冚厚被？筆者嘅要求就基本得嚟有啲極端：需要好安靜嘅環境，連冷氣聲都接受唔到！

喺香港嘅時候，筆者住喺公屋2x層，樓下係巴士總站同埋大排檔。就算去到凌晨都可以聽到樓下車水馬龍，連大排檔夥計收拾啤酒樽嘅清脆玻璃聲都聽得一清二楚（有時連食客講粗口嘅聲都聽到吖）。所以秋冬天需要開窗瞓教嘅時候，外面嘅聲音都就造成我好大嘅煩惱，而夏天嘅冷氣聲亦搞到我難以入睡，令我養成咗戴耳塞嘅習慣。只不過耳塞雖然隔到7-8成音量，但瞓覺嘅時候會「un un地」，始終唔係最舒服。

嚟到英國後，筆者住喺一個人流較少嘅住宅區，第一晚入睡嘅時候簡直驚為天人：外面係超級安靜，只會久不久先聽到少少車聲！當晚係筆者久違十幾年唔洗戴耳塞瞓覺，終於得到咗耳仔自由！而夏天嘅時候因為住嘅地方冇冷氣，又少一個俾佢嘈親嘅煩惱！（有少少斬腳指避沙蟲嘅感覺。哈哈！）

雖然呢一件可能只係好小事，但依家久不久筆者都會喺睡前諗起呢樣嘢，感受到「小確幸」。有時仲會坐喺窗邊感受下外面嘅寧靜，望下月光，同時提醒自己喺呢個新生活中多啲發掘呢種小確幸，珍惜每一日嘅體驗。大家又有冇喺英國生活中搵到啲小確幸呢？歡迎留言分享！

（註：小確幸一詞源於日本作家村上春樹的小說中對幸福的刻畫，對他而言這種幸福是微小而確實的。）