自由嘅學術氣氛：平等＋精英

作者：艾雲膏

嚟咗倫敦兩年有多，日常係商業活動，開吓會、食吓飯、見吓人，日子都過得好快。最近呢兩月有幸獲邀參加咗兩次學術研討會，深受感動，想同大家分享吓。

我喺二月時參加咗經濟事務學會Institute of Economic Affairs嘅一個三文治午餐會。會址座落喺西敏寺一座唔起眼嘅古建築，好容易行過咗個門口都唔知。當日主題係「私人城市的今天與明天：為什麼城市發展需要有競爭」（Private cities today and tomorrow: why we need competition in urban development)。相信好多人都未聽過私人城市呢個概念。研討會聚集咗喺倫敦一班嚟自世界各地搞國際城市、特約城市、自由城市、城市經濟發展模式成個生態圈嘅精英，以硏究員為主。講者係一個烏克蘭裔嘅俄羅斯研究員Vera Kichanova博士。慶幸之前認識咗Vera能夠參加佢呢個presentation，雖然佢當時仍然未加入自由城市基金會（Free City Foundation），但喺過去十年八年佢已經走訪咗全世界搞呢類城市生態圈內嘅主要人物，可以講呢個題目對佢嚟講係如數家珍。研討會喺唔係好大嘅課室形式嘅空間，無預留座位，各人隨便入座，一邊食三文治一邊聽，無人同隔離嗰個竊竊私語，亦無人玩手機，大家都好專心聽。講座內容當然新鮮而有啟發性，之後問嘅問題都好有見地。

喺三月份，有幸又出席咗一個喺倫敦國王學院嘅管治與社會研究中心Centre for the Study of Governance & Society King’s College London 嘅研討會。嚟自星加坡嘅Bryan Cheang博士，講嘅係東亞自由主義：香港與星加坡發展嘅教訓（Liberalism in East Asia：Development Lessons from Hong Kong and Singapore)。機緣巧合認識Bryan ，嚟聽佢講呢個題目真係大開眼界。佢故然係喺自己博士畢業嘅倫敦國王學院講talk如魚得水，認真嚴𧫴之餘，不乏輕鬆而周到嘅思路，年紀輕輕學術根基異常深厚淵博。Bryan將會出嘅新書就係講呢個硏討會嘅題目。講完一個鐘，發問十分踴躍，問題此起彼落，問足半個小時都未完。當中亦有幾個流亡英國嘅香港人參與。

當然，喺兩次咁有學術氣氛嘅硏討論裡面，我梗係爭取發問問題，加深自己嘅投入同埋激發大家積極思考。

兩次好有啟發性嘅研討會，我有以下觀察。倫敦能夠齊集世界各地硏究新問題新方向嘅精英，而佢哋討論嘅問題都唔係屬於某一國或者某一個派別嘅問題，係人類社會未來發展嘅新模式、新方向。會議形式好平等自由 ，所有參加研討會嘅人都無預留座位，自由入座。我喺香港都參加過唔少硏討會、智囊組織、論壇之類嘅活動。但係每次都有d失望，因為會見到好多預留座位。與會者其實無乜認真聽，無乜想得到新資訊或啟發，好好哋一個學術研討會到頭來搞到好似比面派對，認真無癮。

再回想而家嘅香港，以上兩個關於私人城市同埋發展模式嘅議題，隨時比人話違反國安法，港獨甚至話妄議中央都有份, 已經無得討論。令人窒息嘅政治環境，只會令香港社會倒退文化質素下降，死路一條。

*本文章為作者個人意見及經歷，本站對文章內容不負任何法律責任，亦不代表本站立場，讀

者應自行判斷內容真實性。

有興趣睇Bryan Cheang演講全部內容嘅朋友,可以登入此連結。