鐵膠看英國（上）

作者：Wilson

HKerConnect 嘅小編問過我，黎英國生活有印象最深刻？作為一個鐵膠（鐵路愛好者）我一定會話係火車。其次，我住起南倫敦，每一次入城都比火車公司賺一筆。而且每次鐵路罷工，我應該剩係可以「行路上倫敦」，或者巴士遊車河。好彩衣家潮流興Home Office，否則真係荷包大出血。既然火車同我哋生活咁有關，今日同大家分享下到底英國鐵路係一個點樣嘅系統，點買飛先平同埋點樣維護自己嘅消費者權益。

歷史簡介

我地成日用「咸豐年」黎形容好舊嘅事，而英國鐵路仲舊過咸豐年呀，因為世界第一條鐵路由利物浦去曼城通車果陣，中國仲係咸豐老豆道光做緊皇帝！咁舊嘅系統，去到現代當然係跟唔上時代要求，英國人成日笑話時代在變，但係鐵路仲係維多利亞年代。因為英國鐵路喺維多利亞女皇果陣興建，為左唔用咁多錢收地，所以彎位特別多，到左今日都無變。去到七十年代見到日本新幹線成功，英國人都想起條高速鐵路，但係政府又話窮唔想投資，於是英國人發明左鐘擺火車，意思係火車過彎果陣會側向一邊，確保唔使減速。呢個project搞左十幾年，超支到變財政黑洞，加上英國國鐵服務越黎越差，政府決定將國鐵私有化，之後又拖左十幾年，終於將國鐵私有化，變成今日我哋見到花多眼亂嘅火車公司。

英鐵系統問題
英國人有個笑話，叫the arrow of indecision，就係指英國鐵路嘅logo。深一層嘅意思就係英國鐵路不論車型、班次定票價，都係相當混亂。首先鐵路私有化果陣，鐵路本身同基建係一間公司，火車服務就係特許營運商提供，而最值錢嘅火車頭同車卡係由三間火車公司持有，然後租返比特許營運商，呢三間公司當初低價從政府手上買左火車再市價租出賺左唔少，反而特許營運商大家以為佢賣貴飛賺到笑，但事實上大部分收入都係去左人工同租火車，同香港人開鋪服務地產霸權差唔多。而火車公司錢賺左又唔肯買多啲新車，所以我哋搭火車經常見到又有新車又有舊車，有啲車歷史拍得住九鐵以前款黃頭火車。

另一個大問題係路線，上面講過當年英鐵研發鐘擺火車，而同時間日本同法國係興建新路線，新線比城市間快車用，舊線服務local，解決左班次調度問題。但係英國好多幹線衣家仲係direct train 同local train 用同一條線，所以造成左班次混亂問題。班次一亂有delay，火車公司就要賠錢比乘客，而賠償係國有保險度出，之後政府會轉嫁返比營運商。營運商又會話成本上升要求加價，最後受害就係乘客。

最後嘅問題一定係票價，同好多歐洲國家唔同，英國政府補貼鐵路唔算多，而個票價就唔係按遠近收錢，而係按兩個原則：一、站越大收越平，二越早買收越平。感覺同機票有啲似，所以英國車票出名貴，但係如果你住近大站又出遠門之前提早買飛咁就恭喜你，你認真醒目。但如果你住細站附近好似我咁又要返倫敦工，咁火車公司就食硬你，就算年票你都牙痛，小弟同事住MK，一年年票要5千鎊！疫情之後越多人work from home，搭火車人少左，成本又貴左，亦都係最近火車工會成日罷工原因之一。

以上係小弟我睇英國鐵路小小心得，下一篇會講下大家最關心買飛嘅問題。

*本文章為作者個人意見及經歷，本站對文章內容不負任何法律責任，亦不代表本站立場，讀

者應自行判斷內容真實性。