鐵膠分享英國買火車飛

作者：Wilson

上一集講左英國獨特嘅鐵路系統，今集分享下點買車飛最抵
上帝第一日創造天地，出門第一件事當然係查火車飛。之前都講過英鐵票務係用飛機票玩法，離出發日子越近，價格上漲嘅可能性就越大。通常火車公司提前 12 個禮拜開賣車飛，有時甚至更早開始銷售。另外火車公司不定期有promotion，各位精明香港人記得subscribe平時搭開嘅火車公司，佢哋會send email提你。 如果你一個月搭幾次火車通勤，早買飛一樣慳到錢。如果你公司有人性，比各位彈性返工放工，大家都不妨避peak hour，可以慳好多，當然如果你係人生勝利組，公司有津貼你車票錢，咁你可以唔使睇落去喇。

如果你好似黎生咁，返工係唯一訴求，咁年票你走唔甩，如果Hybrid返工，唔好以為買年票一定會抵，因為英國有一種車飛叫彈性季票。你可以根據返工日數去National Rail 嘅季票計算器（season ticket calculator）搵到最適合你嘅車票。之前有英國媒體計過，如果你住Chelmsford，返倫敦，季票可以比年票慳46%。不過都市傳說都話「英國媒體」唔好盡信，買咩飛最好計一計先。

英國搭火車，買 rail card 是常識吧。相信大家都知道五花八門嘅rail card，如果大家住倫敦以外返倫敦工，又兩公婆一齊返，夾到時間，呢度我比較推薦2人同行rail card，大拿拿慳成三分之一，可能抵過年票同季票。

旅行買飛部分，大家去旅行可以先check下一樣叫split ticket 嘅嘢，舉個例，你由A點經B，C點去D點，你官網買到直達飛，但係你去split ticket格價，佢會出到同一班車，但係由A去B，B去C，同C去D三張票，價錢平過直達飛，你搭車果日印晒三張飛，坐定定喺同一班車等人驗票就得。總之買飛慳錢唔難，最緊要肯投資時間格價。

最後，如果你買咗飛，但係火車遲大到，甚至取消。大家唔好怕，因為法例定明你買左飛火車公司一定要送你去目的地。要多啲問站務員，千祈唔好出站自己諗辦法。另外火車遲到超過一段時間係可以退錢嘅，倫敦TfL係delay 30 min，而普通鐵路係遲一個鐘可以apply全額退票。所以火車遲到坐到一肚氣，都千祈唔好唔記得消費者權益。

*本文章為作者個人意見及經歷，本站對文章內容不負任何法律責任，亦不代表本站立場，讀者應自行判斷內容真實性。