中大失落嘅自由同事頭婆嘅謙卑
作者：艾雲膏
上個禮拜中大段校長終於辭職，感覺中大已經被「全面接管」。未來母校嘅一草一木、學生、教職員都會無自由失自由，任由校董會主席同嗰三位所謂立法會議員亂咁搞。
我以前因工作關係，去過好多大陸不同城市，每次話比大陸人知我係香港中文大學工商管理畢業，佢哋一定話「噢！原來你讀中文！」。 我都無𠳔哋咁好氣。
講起母校，除咗風光如畫，安靜而樸素，偌大嘅校園，空間感就好似去咗外國一樣。四年大學生活令我最懷念嘅係大學比學生嘅自由。當年我讀中大時，香港只有兩所大學。而中大係實行美國大學嘅學分制，但又有學位制，即係又要收夠學分，又要考學位試。主修科之外，又可以揀一啲唔啦耕嘅選修科，只要你自己喜歡有興趣，悉隨尊便，無人理你。我得益於呢個制度就係我大一時入讀物理系，但我唔想之後四年繼續讀當年兩間大學讀得最辛苦嗰系，於是一入學選科就揀晒商科課程作為選修科，大二就成功轉去工商管理系，真係好開心可以唔洗捱幾年通宵達旦嘅鋤書日子。
中大嘅自由除此之外，當然係充份體現大學生嘅特權 - 就係「走堂教腳」，呢樣我又享受最多。我大二嘅時候，參加咗醫學院事件委員會。為咗反對醫學院學制（當年我哋反對嘅係中六入讀醫學院要讀六年，中七入就讀少一年），我哋搞咗個全校罷課日，而我就係負責搞罷讀嗰個。記得搞罷課時，因為要成日開會，去深水埗買油漆，搵舖頭車幾十米嘅大帆布嚟油校徽，嗰個月只係上咗兩堂，其他全部教晒腳。最後成功搞咗全校罷課一日，仲喺大學圖書館對開嘅風火台搞咗論壇，油校徽、唱學生會歌，之後將校徽掛上聯合書院同大學本部嘅石牆上。當時呢個校徽掛咗幾個禮拜，學校都無理，我哋就覺得好有成功感，亦對中大好有歸屬感。
中大另一體現自由嘅特色就係通識教育，喺呢方面應該係全港首創。當年所有中大一年級學生，一定要選修一科通識課程，就係喺你主修科之外，學一啲唔相關嘅學科。例如我主修物理，就要揀一啲哲學、人文科學，仲有導師一個月一次同幾個同學討論一吓有關科題。咁樣就開闊咗學生嘅知識同興趣，唔洗凈係識自己讀嗰科。我最記得我哋當時嘅導師係物理系嘅楊剛凱教授，佢喺導修堂同我哋幾個學生講到希臘哲學家點樣討論一枝針上面究竟有幾多個天使，同埋哲學家爭論一隻馬有幾多隻牙嘅時候，一位年輕人直接打開匹馬嘅口去數嘅故事。到而家我仲記得當時我哋幾個同學同楊教授上堂嘅情景。
諗番起上嚟，雖然話香港係英國殖民地，但係我從來都無覺得喺我成長階段嘅殖民地管治期間，有乜嘢虧待過我哋。相反，英國為香港做咗好多對香港有長遠利益嘅政策同設施，有願景仲好尊重香港人同中國文化。中大早喺1963年成立就係一個最好嘅例子。作為一個殖民地宗主國，如果為咗自己國家利益，無需要幫助殖民地去建立一所大學，仲要羅致南來嘅頂尖中國學者文人，又富予美式學制。最不可思議就係命名為「香港中文大學」，而唔係叫香港皇家大學或者叫香港英皇大學之類。可能當時英國政府已經睇到香港喺大陸同亞洲嘅特殊地位，就係想香港發揮中大嘅創校嘅使命 - 「結合傳統與現代，融會中國與西方」而為香港作長遠打算。
英國對香港人嘅尊重，喺1975年英女皇訪港時候嘅活動安排同佢篇演詞充份體現。事頭婆喺大會堂短短兩分鐘講話中，全部都係讚揚香港成就同香港人，絕無一句話香港如何背靠英國管治，或者英國點威幾有成就之類嘅說話。當時英女皇嘅講話，仲有大會現場用半文言文嘅中文一字一句咁翻譯，可以比現場同電視直播觀衆明白佢講咗乜。貴為大英女皇，嚟到一個小小殖民地，如此謙卑又親民，真係冧死香港人。大家可以喺留言下方睇番英女皇訪港片段，回味一下佢嘅風彩同埋感受一下英國人嘅修養內涵。
香港中文大學的四位創辦人於1963年的合照，左起新亞書院校長錢穆、中文大學校長李卓敏、崇基學院校長容啟東及聯合書院校長鄭棟材。
