「尚生活」- 每日睇番你喜歡嘅人同事

作者：高廣垣 （Victoria Harbor Group CEO）

無論身處何方，香港人就係香港人，一定都係忙於喺度建立屬於自己、家庭嘅生活，追求我哋嘅夢想，面對挑戰 （逃出魔幻紀Jumanji裡面開鞋廠嘅嚴父對住被同學仔欺凌嘅小學鷄兒子講 “Face it like a man”） ；尤其係而家不斷沉淪，已經變得光怪陸離嘅香港，為未可知嘅某日子活好每一天。 

散居世界各地嘅香港人，其實已經形成咗一個有相當規模 （critical mass） 嘅海外族群。海外生活有更多新鮮事物，海濶天空。香港人既體驗真正嘅國際化（視野同見識再唔淨係大陸同大灣區），同時又適應緊在地化，好多嘢學，好多新朋友要識。落地生根之餘仲要安居樂業，為自己同屋企人做長遠打算，充滿期盼活好每一天。 

為咗令大家香港人喺忙於工作家庭之餘，關心政治時事以外，可以有一個呼吸新鮮空氣、吸收新養份嘅空間，「移英港鄰」將而家嘅「生活分享」環節喺2月1日擴展成為星期一至六免費嘅網上副刊，叫做LivesUp「尚生活」。每日下午茶或者傍晚放工返到屋企，慢落嚟，飲杯嘢，睇番啲你喜歡嘅人同事，閱讀番你追求嘅嗜好，仲有你響往嘅生活方式（lifestyle）。文化、音樂、藝術、飲食、旅遊、娛樂、潮流、親子、intellectual、公民、通識、香港歷史，香港近況⋯⋯呢啲都可以係我哋日常生活嘅balanced diet 中不可或缺嘅生活閑情、品味喜好。 

感恩得到多達25位各行各業專家、學者、名嘴、文化人、奇人異士認同「尚生活」嘅信念，喺佢哋嘅專欄同大家分享佢哋所見所聞、所思所想，可以令到我哋視野、胸襟擴濶之外，對日常生活有更多領會同期盼。 

最後要強調一句，「尚生活」係一個鼓勵言論自由嘅平台，比各位專欄作者，可以𣈱所欲言，無拘無束自由發揮。我哋仲有兩個欄目係歡迎讀者投稿，其一就係分享打工生活嘅「打工天地」，另外仲有講吓做生意創業嘅「創企業」。 

「尚生活」宣傳片喺27號將會喺YouTube、Facebook同IG有得睇，而家就立即去www.livesup.co，免費訂閱之餘，又可以成為「尚生活」會員，日後仲有衆多會員優惠。