香港人，心水清

作者：艾雲膏 

估唔到，我今個月24號就嚟咗英國三年，再有兩年就可以申請BC。三年前離開香港嘅時候，除咗唔捨得屋企人之外，對住咗幾十年嘅香港我無依依不捨嘅感覺。嚟咗呢幾年，最恨返香港食魚旦牛雜麵，同埋踩番大圍到大尾督嘅單車徑。可惜香港而家搞到咁，令到我真係有家歸不得。但老實講，倫敦已經係我嘅家，我而家喺度生活，再唔會有陌生嘅感覺。加上今個月下旬會搬入去自置永久業權嘅半獨立屋，真正落地生根。

離開咗香港，我好重視自己香港人身份，經常同本地人講“I am from Hong Kong, not China”有時仲會加一句“Hong Kong is not China”，佢哋聽得多就明。英國對於我，我唔會當自己係僑居，因為香港已經放棄咗所有香港人，包括留低喺香港嘅香港人，而且政府每日仲用力踐踏，就好似股票市場某啲上市公司嘅大股東搵小股東著數，日日將自己公司股票向下炒咁。見到香港而家人心已變，成個社會翻天覆地被催殘，我義無反顧唔再視香港為我家，直至到香港光復之後（同當年重光意義差唔多）。 

身為土生土長，喺英國殖民地時期成長嘅一代，由香港移民嚟英國真係最順理成章、自然不過。英國同香港過往嘅關係好密切，甚至係建立咗世界上最好嘅管治系統制度之一，先至令到香港由漁村變成受大多數東西方國家歡迎，同時喜歡利用或者參與嘅市場。真係可以話左右逢源，大吃四方。

對於英國政府管治嘅香港，有幾個令我深刻印象嘅事例，其中之一係教育。記得小學時除咗英文好似中數係必修，同埋本英文書最底頁印咗一個相信係英國女人嘅樣之外（唔係英女皇，可能係出版商之類），其他嘢一啲英國嘅嘢都無。讀英文中學五年，初中讀西史、地理、EPA所有科目又係一啲英國嘢都無教，亦無得學。例如地理，初中只有北美同澳洲地理，其他科目無學英國政治、無英國歷史、無英國人物，無嗰啲乜嘢英國國家成就之類 - 全部付之闕如。唔好話殖民地教育洗腦，連你想學都無得學，何來洗腦？

另外一件事係67暴動，我當年小一，住元州街舊樓。對住北河街街市，我同姊妹成日喺窗口望住北河街，時不時就有寫住「同胞勿近」嘅紅色包裹放喺條街上，之後就大批警察到場。次次都係「詐彈」，但係有一次喺我哋對面郵政局嘅土製菠蘿（即係自製炸彈）就炸死咗一個警察，仲有碎片飛咗上我哋間房。 

67暴動後，英國政府不但無去將問題歸咎於香港左派或者大陸，反而成立獨立調查，之後立即大幅改善管治同吸納本地精英，推出青年政策改善青年福利。67暴動成日有恐怖襲擊（包括喺條街度夾生燒死商台節目主持林彬同佢堂弟），令到社會動盪，人心惶惶，有錢人大量移民。但最令人佩服係紅磡海底隧道就喺暴動之後兩年，即69年9月動工，72年8月通車。足以證明，當時香港政府雖然面對非常難搞局面，但仍然為香港長遠發展出心出力，推進咁重大嘅基建，仲喺三年時內就完全。同時仲喺71年推行六年免費教育，之後喺72年推出十年建屋計劃。 

英國政府喺我成長年代到97年喺香港，為香港人真係做咗好多德政，令到香港人材輩出，經濟騰飛，政治權利不斷增加。而家喺英國三年，更加覺得英國政府愛民如子，好多都係信任制度，以人為本。一個政府好唔好，係咪真係為咗社會同人民做事，香港人眼睛係雪亮，心水好清嘅！