倫敦單車任我行

作者：艾雲膏

相信住喺倫敦嘅人都習慣咗鐵路同巴士罷工嘅日子，其實係有d唔方便，但試過之後就會搵到自己方法去適應。今個月十五號成個倫敦地鐵罷工，除咗伊利沙伯線之外，其他地鐵綫都停駛。呢d日子好難預時間，本嚟應該盡量避免外出。但係嗰日一早約咗兩個重要會議喺倫敦市中心，又唔改得，唯有想辨法準時出席。當日早上傾完電話會議，以為仲有一個鐘頭四十五分鐘時間好充裕，因為平時坐地鐵只需四十五分鐘。點知查一下Citymapper，因為無地鐵引致大塞車，發現原來坐巴士或者揸車去都最少要兩個鐘。點計都會遲到，再查一下，原來踩單車去就只需要一個鐘。於是立即打電話比對方，確定佢哋公司可以比我將單車放入去。跟住bum車呔氣、換戰衣，帶定便裝到時換，咁就出發去兩個business meetings。

平日喺倫敦市內踩單車，因為所有巴士綫都容許單車使用，間中亦有單車徑，有啲地方可以穿過公園，所以好𣈱順，唔洗塞車，一般都比揸車快。我平時當自己好似其他交通工具一樣，停紅燈，從來唔會踩上行人路。但係嗰日就唔同晒，由於所有道路都塞滿晒車，d巴士、大貨車、混凝土車，連埋私家車、的士都擠得水洩不通。於是唯有間唔中踩上行人路，亦有衝吓紅燈，最後都準時到達。

有趣嘅係，當我踩到去海德公園𥚃面嘅時候，迎面而嚟嘅係一批又一批嘅示威人仕， 人山人海，絡繹不絕。我見仲有時間，就停低同佢哋影番張相。睇落佢哋嘅遊行隊伍，有少少似我哋往年嘅七一遊行一樣，乜嘢訢求都有。當然有為工人權益，亦有為下一代教育，有為退休金，為性小衆平權同埋環保，氣候變化，林林總總，各適其適，熱鬧非常。當然，亦有警察喺度幫助指揮交通，協助遊行順利進行（唔係阻礙遊行）。據講當日遊行人數約有五十萬，同香港以往嘅遊行一樣，都係和理非，第日大家又正常返工返學。

我兩年前移英時候，帶咗兩架單車過嚟。呢兩年喺倫敦踩咗好多次單車，多數都係由屋企踩去攝政王公園Regents Park繞六至八個圈就返歸。試過由我喺倫敦西北嘅屋企，踩去Richmond Park，一來一回都有四五十公里，頂得吓癮。